!?*#%@
അന്തം വിട്ടിരിക്കുക; അതൊരു വല്ലാത്ത സുഖമുള്ള എന്നാല്‍ തീരെ സുഖമില്ലാത്ത അവസ്ഥയാണ്. ഇത്തരം അവസ്ഥ മിക്കപ്പോഴും കൈവരിക്കുന്നത്, കൈകാര്യം ചെയ്യുന്ന വിഷയത്തെക്കുറിച്ച് ഗഹനമായ അറിവുള്ള അധ്യാപകരുടെ ക്ലാസ്സുകളിലായിരിക്കും. "Is it so? Isn't it?" എന്ന അദ്ധ്യാപകന്‍റെ ചോദ്യത്തിന് മുന്‍പില്‍, രണ്ടിനും ആണെന്നോ അല്ലെന്നോ ദ്യോതിപ്പിക്കുന്ന വിധം തലയാട്ടുക. സംവദന വിഷയത്തെക്കുറിച്ചുള്ള ദാതാവിന്‍റെ ബൗദ്ധിക തലം സ്വീകര്‍ത്താവിന്‍റെതുമായി താരതമ്യം ചെയ്യുമ്പോള്‍ നോക്കെത്താ ഉയരത്തില്‍ ആയിരിക്കുകയും സ്വീകര്‍ത്താവ് ഒന്നും മനസ്സിലാകാതെ എന്നാല്‍ എല്ലാം മനസ്സിലായ പോലെയും തുടരുക- കണ്ണുമിഴിച്ചു, ഇമവെട്ടാതെ, വായ പകുതി തുറന്നു, ശ്വാസ്വോച്ച്ചാസത്തിന്‍റെ ലാഞ്ചനകള്‍ പുറത്തു കാണിക്കാതെ, വിഡ്ഢികൂശ്മാണ്ട ഭാവം അകത്തു നിറഞ്ഞു ജ്ഞാനികൂശ്മാണ്ട ഭാവം പുറത്തു വരുത്താന്‍ കഷ്ടപ്പെട്ട്, അങ്ങനെയങ്ങ് ഇരിക്ക്യ.......

No More
അവകാശ വാദങ്ങളില്ല
കൂട്ടകരച്ചിലുകളും കേള്‍ക്കാനില്ല
പുതച്ചിരിക്കുന്ന പുതപ്പിന്
ആരുടേയും നിറമില്ല
ആള്‍ക്കൂട്ടമില്ല പ്രസംഗങ്ങളുമില്ല.
ആരെല്ലാമോ ഉണ്ടായിരുന്നു!
ഇപ്പോള്‍ ഈച്ചയും ഉറുമ്പും
പെരുച്ചാഴികളും മാത്രം.
ആതുരസേവന പഠനകേന്ദ്ര
വിദ്യാര്‍ഥികള്‍- അഭിനവ ഭിഷഗ്വരന്മാര്‍  
പേടിയോടെ, അറപ്പോടെ തള്ളിയ;
പുഴുവരിച്ച് ഉറുമ്പരിച്ച്
കുഴിച്ചിടപ്പെട്ടോരനാഥ ശവം
കൂടെ പുറത്തറിയാതെ എന്നോടൊപ്പം
കുഴിച്ചിടപ്പെട്ട നിറമുള്ള കഥകളും.

നാളെ 
ഇന്നലെ എന്തായിരുന്നുവോ നാളെ അതല്ലാത്തതായ  ഒരു  അവസ്ഥ. രണ്ടിനും ഇടയില്‍ രണ്ടും കലര്‍ന്നതായൊരു  ഇന്ന്. ആ ഇന്നിനു ഒരു സുഖമൊക്കെയുണ്ട് - സ്വപ്നത്തിന്‍റെയും  പ്രതീക്ഷയുടെയും വര്‍ണപ്പകിട്ടുകള്‍ക്കൊപ്പം  , ആശങ്കയുടെ നേരിയ കാളിമയും കലര്‍ന്ന, ഒരു ക്ലാസ്സിക്‌ portrait ചിത്രത്തിന്‍റെ ഭാവം.
    ഒരു ദിവസത്തേയ്ക്കാണെങ്കില്‍  കൂടി ഇന്ന്  ഞാനൊരു രാജകുമാരി തന്നെ ആയിരുന്നു - വേഷത്തില്‍, പദവിയില്‍ എല്ലാം! ഒരു പക്ഷെ നാളെയൊരു ദിവസത്തേക്ക് കൂടി ആ പദവി നീട്ടിക്കിട്ടുമായിരിക്കാം. കാമുകിയില്‍ നിന്ന് ഭാര്യയിലേക്ക്, മകളില്‍ നിന്ന് മരുമകളിലേക്ക്, കൂട് വിട്ടു കൂട് മാറ്റം.
ആ പരകായ പ്രവേശം  വിജയകരമാകുമോ എന്തോ - വിജയകരമാകാതിരിയ്ക്കാന്‍  ഒരു വഴിയും കാണുന്നില്ല;
'ന : സ്ത്രീ സ്വാതന്ത്ര്യമര്‍ഹിതി ', മനുസ്മ്രിതിയിലെ വരികള്‍ സ്മൃതി  മണ്ഡപത്തെ  വിട്ടു പോകാനാവാത്തവിധം  വിധം  അടിച്ചേല്‍പ്പിക്കപ്പെട്ടിരിയ്ക്കുന്നു.
   ഡിഗ്രിക്ക് പഠിയ്ക്കുമ്പോള്‍ പഠിക്കാന്‍ ഉണ്ടായിരുന്ന ' ഡോള്ല്സ് ഹൌസിലെ ' നോറ; വല്ലാതെ അത്ഭുതപ്പെടുത്തിയിരുന്നു. ഞാനും ഒരു പാവയല്ലായിരുന്നോ ? എന്ത് പറയണം , എങ്ങോട്ട് പോകണം, എങ്ങനെ പെരുമാറണം - ചലിപ്പിച്ചിരുന്ന  നൂലുകള്‍ അച്ഛനില്‍ നിന്ന് ഭര്‍ത്താവിലേക്ക്. പാവ പഴയ പാവ തന്നെ . സമൂഹത്തിനും പാവകളെ മതി , അല്ലാത്തവ നിഷേധികള്‍ , അധിക പ്രസംഗികള്‍.
" നീ ഇവിടെ ഇരുന്നു സ്വപനം കാണാ ! മണിയെത്രയായെന്നു അറിയോ ? " അമ്മയാണ്. സ്വപനമായിരുന്നോ ആശങ്കയായിരുന്നോ , അറിയില്ല . ക്ലോക്കിലേക്ക്  നോക്കിയപ്പോളാണ്  സമയം പന്ത്രണ്ട്   ആയിരിക്കുന്നു. 


   " മോള് കിടന്നോളു, ഇല്ലെങ്കില്‍  ഈ പ്രസാദം ഒന്നും നാളെ മുഖത്തു കാണില്ല്യട്ടോ '. എന്‍റെ മുഖത്തെ  അവര്‍ അവരുടെ പരുപരുത്ത തഴമ്പിച്ച കൈകളില്‍ എടുത്തുകൊണ്ട്  പറഞ്ഞു . ആ മുഖത്ത്, കണ്ണില്‍, ഞാന്‍ കണ്ട ഭാവം എന്തായിരുന്നു ? തന്നേത്തന്നെ  കണ്ടതിന്‍റെ അത്ഭുതമോ! നൈരാശ്യമോ ? തിരിച്ചറിയാന്‍ കഴിഞ്ഞില്ല , അപ്പോഴേക്കും  അമ്മ മുഖത്തുനിന്നു കണ്ണുകള്‍ എടുത്തു. അന്ന് അമ്മ എന്നോട് വളരെ ചേര്‍ന്ന് കിടന്നു.

മറ്റൊരു ചരമഗീതം, അല്ല! പ്രേതഗീതം 
ഇവിടെ ഞാന്‍ ഉണ്ടായിരുന്നു ........
കല്ലായി മണ്ണായി 
ചെടിയായി വടു വൃക്ഷമായി 
അതിന്മേലെ ഫലമായി കിളിയായി;
എന്‍ കാലുകളെ ഇക്കിളിപ്പെടുത്തി
കൊഞ്ചിക്കുഴഞ്ഞൊരു പുഴയുമൊഴുകിയിരുന്നു,
ഇതെന്‍റെയും അവളുടെയും പ്രേതഗീതം.
ആദ്യം നിങ്ങളവളെ
എന്നില്‍ നിന്നും പറിച്ചെറിഞ്ഞു,
അവളുടെ കൊഞ്ചുന്ന ചിണുങ്ങുന്ന മണല്‍ഹൃദയം
നിങ്ങള്‍ കോണ്‍ക്രീറ്റിനുള്ളില്‍ കുഴിച്ചിട്ടു.
     'ചക്രങ്ങള്‍'* സൃഷ്‌ടിച്ച നിങ്ങള്‍ക്കായിതാ 
ഞാനെഴുതിയ നിങ്ങളുടെ ചക്രം-
കാടനായി, നാടനായി, നാഗരികനായി
പിന്നെ വീണ്ടും 'കാടനായി'.
കാന്‍സര്‍ സെല്ലുകള്‍ കണക്കെ
കോണ്‍ക്രീറ്റ് സൗധങ്ങള്‍ പൊങ്ങുമ്പോള്‍
ബാധിക്കുന്നതെന്‍ ഹൃദയത്തിനാണ്   കാന്‍സര്‍    
അതിന്‍റെ വ്യാപനത്തിന് വേഗത കൂട്ടാനായി 
നിങ്ങള്‍ കണ്ടെത്തിയിരിക്കുന്നൊരൊന്നൊന്നര
ഓങ്കോ ജീനിനെ**- ജെ.സീ.ബി എന്നൊരു ഓമന.
ഇപ്പോള്‍ നിങ്ങളെന്നെ പഴഞ്ച്നെന്നു പറഞ്ഞേക്കാം
നിന്‍റെ നെഞ്ച് വെട്ടിപ്പൊളിക്കുമ്പോള്‍ നീയും പഴഞ്ചനാകും.
പെണ്ണിനെ വിറ്റവനെക്കാള്‍ മാന്യതയോ,
മണ്ണിനെ വിറ്റവന്????!
നോട്ടിന്‍റെ ;    ഹുങ്കിന്‍റെ നുളപ്പില്‍ നീയെത്രകാലം?
നിന്‍ കാലിന്‍ ചുവട്ടിലെ മണ്ണുമാന്തി
നിന്‍ കീശ വീര്‍പ്പിച്ചു എത്രകാലം!
'പ്രകൃതി വിരുദ്ധങ്ങളെ' കണ്ണടച്ചനുകൂലിച്ചും
പറയാതെ സമ്മതിച്ചവരായ നിങ്ങള്‍,
പട്ടാപ്പകല്‍, എന്‍ ഉടുതുണി ഉരിഞ്ഞപ്പോള്‍
എന്നെ ബാലാത്സംഘം  ചെയ്തപ്പോള്‍ 
നിര്‍ന്നിമേഷരായി, ഉദ്വേഗഭരിതരായി
ഇമവെട്ടാതെ നോക്കിനിന്നപ്പോള്‍
അതിശയപ്പെട്ടില്ല   തെല്ലും  സങ്കടപ്പെട്ടുമില്ല ഞാന്‍.
ചരിത്രത്തെ അവഗണിക്കുന്ന 
പാടമുള്‍ക്കൊള്ലാത്ത  മൂഡാ,
അവള്‍ വരും ഒരു മഹാപ്രളയമായ്
കല്ലുടച്ചുതകര്‍ത്തു മണ്ണാക്കി , മണ്ണുകൂട്ടി കല്ലാക്കി
എന്നെ അവള്‍ പുന:സൃഷ്ടിക്കും 
എന്‍റെ കാലില്‍ അന്നവള്‍, പഴയപോലെ 
വീണ്ടും ചിണുങ്ങിയൊഴുകും - ശാന്തയായി
ഇന്നലെ ഞാനുണ്ടായിരുന്നു, ഇന്ന് ഞാനില്ല 
പക്ഷെ നാളെ ഞാനുണ്ടാകും,
അത് കാണാന്‍ നീയുണ്ടാകില്ല-
തെന്നതെന്‍ വലിയ നൊമ്പരം.




*ചക്രങ്ങള്‍ - nitrogen cycle, rain cycle, CO2 cycle etc.
** Oncogene - Gene responsible for cancer

?????

'integration differentiation'

ഭൂരിപക്ഷത്തെയും വിറപ്പിച്ച 

പിടി കിട്ടാത്ത വല്ലാത്തൊരു സമസ്യ തന്നെ 

ഇപ്പോള്‍ എനിക്ക് മുന്നില്‍

ചോദ്യ ചിഹ്നമായി നില്‍ക്കുന്നത് ഇവയല്ല 

എങ്കിലും സമസ്യ തന്നെ

ഗണിതത്തില്‍ നിന്നും link biology via.

തത്വ ശാസ്ത്രത്തിലേക്ക് ഒരു ചുവടുമാറ്റം 

kidney ക്ക് വില ലക്ഷങ്ങള്‍ 
രക്തദാനം ജീവദാനം- ജീവന്‍റെ വില
നേത്രദാനം മഹാദാനം- വെളിച്ചത്തിന്‍റെ വില
കൂടുന്ന മദ്യ ഉപഭോഗത്തിനാനുപാതികമായി
കരളിന്‍റെ ആവശ്യകതയും ഏറുന്നു
മാറുന്ന ജീവിത ശൈലി 
മാറ്റുന്നു ഹൃദയങ്ങളെ
വില മിച്ചവും ഗുണം തുച്ചവുമായ 
heart transplantation കള്‍
അങ്ങനങ്ങനെ മനുഷ്യ ശരീര differentiation
കോടികളുടെയും കോടിക്കോടികളുടെയും
തിളക്കമേകുമ്പോള്‍
ഇവയുടെ integrated solution ആയ 
മനുഷ്യ ശരീരം അതായത് മനുഷ്യജീവിതം 
വിലയില്ലാത്തതായി വിലയം പ്രാപിക്കുന്നു-
"conditions apply"
only applicable to പിണം 
'പണമില്ലാത്തവന്‍ പിണം'
(പണമില്ലായ്മ+power ഇല്ലായ്മ)2 equal to
total ignorance2+2* മതിപ്പില്ലായ്മ+ വിലയില്ലായ്മ2 

നോക്കുകുത്തി

ലൂയി പതിനാലാമാനും 

പത്നിക്കും അഭിമാനിക്കാം 

കുഴിമാടത്തിലിരുന്നു പുളകമണിയാം

രണ്ടു നൂറ്റാണ്ടുകള്‍ക്കു ശേഷവും 

അവര്‍ക്ക് പിന്‍ഗാമികളേറെ 

അപ്പത്തിനു പകരം കേക്ക് വിഴുങ്ങാന്‍-

പച്ചയ്ക്ക് പറയാതെ പറയുന്നവര്‍

'ഇന്ധന വില മാസാമാസം 

കുതിയ്ക്കുന്നത് ഭാവിയില്‍ 

inflation കുറയ്ക്കുമെന്ന്' ഒരാള്‍,

തലപ്പത്തിരുന്നു ബാങ്ക് interest curve

90 ഡിഗ്രിയ്ക്ക് വച്ച് മര്‍ക്കടമുഷ്ടി 

പിടിക്കുന്ന മറ്റൊരാള്‍ 

inflation അപ്പോഴും 

പിടി കൊടുക്കാത്ത കള്ളനെ പോലെ....

വിശക്കുന്ന  വയറുകള്‍ക്ക്‌

എണ്ണത്തില്‍  ഒട്ടും കുറവില്ലാത്തത് പോല്‍   

ധാന്യശേഖര അറയില്‍ 

നശിച്ചുകൊണ്ടിരിക്കുന്ന ധാന്യമണികള്‍ക്കുമില്ല

കയ്യും കണക്കും.

ചാവുന്ന വയറിലേക്ക് 

നശിക്കുന്ന ഒരു ധാന്യമണിയെങ്കിലും 

എത്തിക്കാന്‍ നിയമമ്മില്ലത്രേ?

ടാറ്റയ്ക്കും ബിര്‍ലയ്ക്കും അമ്ബാനിമാര്‍ക്കും

എന്തിനു എം.പിമാര്‍ക്കും ക്രിമിനലുകള്‍ക്കും വരെ 

നിയമ ഭേദഗതി  ഒരുദിവസത്തിനുള്ളില്‍

വിശക്കുന്ന- ചാവുന്ന വയറുകള്‍ക്ക്‌

മുന്നില്‍ നിയമം വെറും നോക്കുകുത്തി 

മറുഭാഗത്ത്‌ 'ജീവിക്കുന്ന' പ്രജകള്‍ 

അവര്‍ക്കിടയിലെ മരിക്കുന്ന വയറുകള്‍ക്ക്‌ മുന്‍പില്‍

കണ്ണു പൊത്തി ചെവിപൊത്തി വായപൊത്തി

ചലനമില്ലാത്ത നോക്കുകുത്തിയായി......

പള്‍സ്

ചിരിച്ചു ചിരിച്ചു ചിരിച്ചു....... വയറു കൊളത്തിപ്പിടിച്ചു. ആരാന്‍റെ അമ്മക്ക് ഭ്രാന്തു പിടിച്ചാല്‍ അല്ലേലും കാണാന്‍ കുറച്ചു ചന്തമൊക്കെ തോന്നും, പക്ഷെ ഇത് ചിരിക്കാതിരിക്കാന്‍ കഴിയുന്നില്ല, ഹെന്‍റെമ്മോ ! പറഞ്ഞു വരുമ്പോള്‍ നിങ്ങള്‍ക്ക്  ചിലപ്പോള്‍ ചിരി വരണം എന്നൊന്നും ഇല്ല; പക്ഷെ എനിക്ക് ചിരിച്ചു കൂടെ? 'ആട്ടം നോട്ട'ത്തില്‍  കവി കെ.ആര്‍.ടോണി പറഞ്ഞതുപോലെ......... 

കലാലയ അന്തരീക്ഷം ഒരിയ്ക്കലും സ്ടാറ്റിക് അല്ല ഡയനാമിക് ആണ്; അത്  മാറ്റങ്ങളുടെ പ്രളയനിലമാണ്‌. ഇന്നലത്തെ കലാലയ ജീവിതമല്ല ഇന്നത്തെ ക്യാംപസുകളില്‍ ഉള്ളത്, നാളെ അത് മറ്റൊന്നായിരിക്കുകയും ചെയ്യും. അവിടങ്ങളിലെ അന്തരീക്ഷമാകട്ടെ ഒന്ന് മറ്റൊന്നിന് സമാനവുമല്ല, എന്നാല്‍ ചില പൊതു ട്രെണ്ടുകള്‍ ഉണ്ട് താനും.

വായനക്കാരായ നിങ്ങള്‍ക്ക് ചിരി വരാത്ത എന്നാല്‍ എനിക്ക് ചിരി അടക്കാനാവാത്ത സംഭവം വിവരിക്കാന്‍, ഇത്രയും ഘനമായ മുഖവുര മതിയെന്ന് തോന്നുന്നു. കാര്യത്തിലേക്ക് കടക്കാം, എന്‍റെ കോളേജില്‍  പ്രത്യേകിച്ച് ആണ്‍കുട്ടികളുടെ ഇടയില്‍ കൂടിവരുന്ന ഒരു പുതിയ കൂട്ടമാണ്‌, 'ശശികള്‍' ഇത്രയും എഴുതിത്തീര്‍ന്നപ്പോഴെക്കും  എന്‍റെ മനസ്സിലേക്ക് രണ്ടു ഭയങ്ങളാണ് ഓടിക്കയറിയത് -ഇതെങ്ങാനും കേട്ട് സംഗതി 'ഇത്രയേ ഉള്ളൂ' എന്നറിയുന്നതിനു മുന്‍പ്  വല്ല ചാനലുകാരും വട്ട മേശ സമ്മേളനമോ, ആളുകളെ അപ്പുറവും ഇപ്പുറവും ഇരുത്തി ചുക്കാന്‍ പിടിക്കുന്ന ആള്‍ നടുക്കളത്തില്‍ ചവിട്ടുനാടകമോ മറ്റോ അരങ്ങേറുമോ എന്നതാണ് ഒന്നാമത്തേത്. രണ്ടാമത്തേത്,   യഥാര്‍ത്ഥത്തില്‍ " ശശി " എന്ന പേരുള്ളവര്‍ സംഘടിച് എനിക്കെതിരെ കേസ് ചാര്‍ജ് ചെയ്യുകയോ 'കാണേണ്ട വിധം ' കാണുകയോ ചെയ്യുമോ എന്നതാണ്. രണ്ടാമത്തെ കൂട്ടരോട് ഒന്ന് പറഞ്ഞു കൊള്ളട്ടെ, ആ പേരിട്ടതും പ്രചരിപ്പിച്ചതും ഞാനല്ല എപ്പോളോ എങ്ങനെയോ അത് പൊട്ടിമുളച്ചു. ആരും copy right ഉം കൊണ്ട് വരികയും ഇല്ല . കാര്യം 'നിസ്സാരം' പഴയ 'രമണന്‍റെ' പുതിയ കാലഘട്ടത്തിലെ പുതിയ മുഖം. പക്ഷെ പുതിയ രമണന്‍മാര്‍ താടി നീട്ടി വളര്‍ത്തി ശോകഗാനവും പാടി ഒരു തുണ്ട് കയറിലോ അഗാധമായ കൊക്കയിലോ 'മരണന്മാര്‍' ആകാന്‍ ഒരുക്കമല്ല. അവരിപ്പോള്‍ വളരെ ബോള്‍ഡ് ആണ്, അത്തരം തീരുമാനങ്ങളിലേക്ക് അവരെ നയിക്കണമെങ്കില്‍ വീട്ടുകാര്‍ "മഴ ആയതു കൊണ്ട്  ഇന്ന് ബൈക്ക് എടുക്കേണ്ട" "മൊബൈല്‍ അപ്പ്‌ ഗ്രേഡ് ചെയ്യുന്നത് ഇന്ന് വേണ്ട നാളെയാക്കാം" അങ്ങനെ നീളുന്ന 'അതിഘോര'മായ statementകള്‍ ഇറക്കേണ്ടതുണ്ട്. കാമ്പസിലെ പുതിയ അസ്സോസ്സിയേഷന്‍ ആണ്  C.P.A ( ചോര പോയവരുടെ അസ്സോസ്സിയേഷന്‍ ) 'ശശി'കള്‍ ആണ് അതിലെ members.ഏറ്റവും കൂടുതല്‍ 'ശശി' ആയവന്‍ പ്രസിഡന്‍റെ, അത് കഴിഞ്ഞു സെക്രടറി അങ്ങനെ അസ്സോസ്സിയേഷനിലെ സ്ഥാനങ്ങള്‍ പോകുകയായി.അടുത്ത കോളേജ് ഇലക്ഷനില്‍ മുഖ്യധാരാ പാര്‍ട്ടികളോടൊപ്പം C.P.A ഉം മത്സരിക്കുന്നുണ്ടെന്നൊരു വാര്‍ത്ത കേട്ടു, ഉള്ളതോ എന്തോ?!

                ഓരോ membersന്‍റെയും  'കദന' കഥകള്‍ വ്യത്യസ്തമാണ്. ഈ അടുത്ത് ഒരു memberന്‍റെ  കഥ ഞാന്‍ അറിഞ്ഞത് ഇങ്ങനെയാണ്...

      അവനു membership അംഗീകരിക്കാന്‍ ഒരു പ്രങ്ങ്യാസം. തന്‍റെ പ്രണയം കഥാനായിക നിഷേധിച്ചെങ്കിലും അവള്‍ പഴയത് പോലെ തന്നെ നന്നായി ചിരിക്കുന്നു തന്നോട് സംസാരിക്കുന്നു....... ഇതെല്ലം അവനെ പ്രതീക്ഷ കൈവെടിയാന്‍ വിസമ്മതിക്കുന്നു. തന്നില്‍ ഇപ്പോഴും പ്രതീക്ഷകള്‍ ഉണ്ടെന്നു മനസ്സിലാക്കിയ അവന്‍റെ ഉറ്റ സുഹൃത്ത്‌ അവന്നു കരുത്തേകി, ആത്മവിശ്വാസം പകര്‍ന്നു. നമ്മുടെ കഥാനായകന്‍ ഇപ്പോഴും അറിഞ്ഞിട്ടില്ലാത്ത 'രഹസ്യം' എന്താണെന്നുവെച്ചാല്‍ അവനു ആത്മധൈര്യം പകര്‍ന്ന, ഇപ്പോഴും തോളില്‍ കൈവെച്ചു നടക്കുന്ന അവന്‍റെ       

ആത്മസുഹൃത് പിറ്റേന്ന് തന്നെ പോയി കഥാനായികയോട് പ്രണയാഭ്യര്‍ത്ഥന നടത്തി എന്നുള്ളതാണ്. ആത്മസുഹൃത്തിന്‍റെ  പ്രണയാഭ്യര്‍ത്ഥന കഥാനായിക സ്വീകരിച്ചോ ഇല്ലയോ എന്നതൊക്കെ കഥയ്ക്ക് പുറത്തുള്ള ചോദ്യം, അതിനുത്തരം ആലോചിച്ചു തലപുകയ്ക്കാന്‍ നിങ്ങളോടൊപ്പം ഞാനില്ല. എന്‍റെ മനസ്സ് ഇപ്പോഴും കഥാനായകനോടൊപ്പം തന്നെയാണ്, അയാളിപ്പോഴും തന്‍റെ മുളപൊട്ടിയ പ്രതീക്ഷകള്‍ക്ക് വെള്ളം ഒഴിച്ചുകൊണ്ടിരിക്കുക തന്നെയാണ്......

സുഹൃത്തേ നിന്നോടെനിക്ക് ഒന്നേ പറയാനുള്ളൂ, 
          "പ്രണയം ദുഖമാണ് ഉണ്ണീ
           ഒറ്റയ്ക്കല്ലോ സുഖപ്രദം"(കവി ക്ഷമിക്കുക)

1:1

ഭൂതകാലത്തിന്റെ നൊമ്പരങ്ങളെ 

 നിങ്ങളെന്തിനെന്നെ

വീണ്ടും വീണ്ടും മുറിവേല്‍പ്പിക്കുന്നു

ഓരോ ഉയിര്‍ത്തെഴുനേല്‍പ്പിനും

പുനര്‍ജന്മത്തിനും ഒടുവില്‍

മറവി കൂട്ടുവന്നിരുന്നെങ്കില്‍

നല്ല ഓര്‍മ്മകള്‍ മായ്ക്കാതെ,

അതുണ്ടെന്നു ആകില്‍;

ഇപ്പോഴും ചോരകിനിയുന്ന

മുറിവുകള്‍...... 

പാടെ മായ്ക്കപ്പെടെണ്ടതായിരുന്നു.

പിന്നീട് ഞാനറിഞ്ഞു

ആരോ പറഞ്ഞതാവാം

അല്ലെങ്കില്‍ പലപ്പോഴായി

ജീവിതം എന്നെ നോക്കി

കൊഞ്ഞനം കുത്തുന്നതിനിടയ്ക്കു

മൊഴിഞ്ഞതും ആവാം

എങ്ങനെ ആയിരുന്നാലും ഞാന്‍ കേട്ടു.

വലിയ വീഴ്ചകള്‍ക്കൊടുവില്‍

എഴുന്നേല്‍ക്കാന്‍, പിന്നെ വേച്ചു നടക്കാന്‍

ഇരു കക്ഷത്തിനിടയിലും തിരുകുന്ന

ഊന്നുവടികളാണ് അവയെന്ന്-

മധുരസ്മൃതികളും കൊടിയനൊമ്പരങ്ങളും

അവയങ്ങനെ 1 : 1  അനുപാതത്തില്‍

ഇടതും വലതുമായി കൂട്ടിരിക്കുന്നു

അനുപാതം തെറ്റിയെന്നു

തെറ്റുദ്ധരിച്ചവരാകട്ടെ

അഹങ്കാരത്തെയോ   ഒരു തുണ്ട് കയറിനെയോ

തേടിപ്പോയി ......

മണ്ടന്മാര്‍, ജീവിതത്തെയും

പ്രോഫിറ്റ് ആന്‍ഡ്‌ ലോസ് അക്കൗണ്ടില്‍

ആക്കിയ  തിരുമണ്ടന്മാര്‍

ക്ഷമ

ക്ഷമക്കും വെച്ചിരിക്കുന്നു 

ഒരു നെല്ലിപ്പടി- അതിരായി!

എങ്കില്‍ അതെങ്ങനെ ക്ഷമയാകും?

മാതാ പിതാക്കള്‍ നല്‍കുന്ന-

-തൊരു ക്ഷമ,

നിയമം കണ്ണടക്കുമ്പോള്‍

ലഭിക്കുന്നു അല്പായുസ്സായ

വല്ലാത്തൊരു ക്ഷമ,

കഴുതയെന്നു പരിഹസിക്കപ്പെടുന്ന

ജനങ്ങള്‍, തുടരെ നല്‍കുന്നു

ഒരിയ്ക്കലും മനസ്സിലാക്കാന്‍ കഴിയാത്ത ക്ഷമ

 വിദ്യാര്‍ഥികളുടെ അസഹിഷ്ണുതയുടെ ക്ഷമയ്ക്ക്

ആപേക്ഷികമാകുമോ അധ്യാപകരുടെ

ക്ഷമയെന്നു സന്ദേഹം

സ്ത്രീയുടെ ക്ഷമയ്ക്ക്

സഹനത്തിന്റെ പരിവേഷം

അങ്ങനങ്ങനങ്ങനെ 

ക്ഷമകള്‍ 'പലവിധമീയുലകില്‍ സുലഭം'

"ഇവര്‍ ചെയ്യുന്നതിന്നതെന്ന്

അറിയായ്കയാല്‍ ഇവരോട് ക്ഷമിക്കേണമേ"

അങ്ങനെയുമുണ്ട് ഒരു ക്ഷമ.        

Kakkayam valley & Dam really thrills you especially the drive...

ഇലക്ഷന്‍ 

ആരോപണം പ്രത്യാരോപണം 

ആക്രമണം കൈമലര്‍ത്തല്‍
ചളികലക്കല്‍ ചളി വാരി എറിയല്‍
ഭീഷണി; കൊഞ്ഞനംകുത്തല്‍.
പല്ലിളിക്കല്‍ പല്ല് കടിക്കല്‍,
പല്ല് അടിച്ചു പൊഴിക്കല്‍ 
അട്ടഹാസങ്ങള്‍ കരച്ചിലുകള്‍ വിങ്ങലുകള്‍.
കഴുതയെ ജനമാക്കല്‍
ജനം വീണ്ടും കഴുതയാകല്‍
ശുഭം, മനോഹരം; സഹനം .

പരീക്ഷ 

നമുക്ക് നമ്മെത്തന്നെയും 

മറ്റുള്ളവര്‍ക്ക് നമ്മളെയും 

വെളിപ്പെടുത്തുന്ന അപൂര്‍വ നിമിഷം 

തന്‍റെ ഇഷ്ടവിഷയത്തില്‍ 

ഒരുവന്‍ ശക്തനെന്നും 

പ്രബലനെന്നും തോന്നുന്ന നിമിഷത്തില്‍ 

മുഴങ്ങുകയായി പരീക്ഷ ബെല്‍ 

ഫലം സുനിശ്ചിതം- തോല്‍വി 

പക്ഷെ രണ്ടുണ്ട് പ്രതികരണം 

ന്യായീകരണം അഥവാ പഴിചാരല്‍,

പ്രതിക്കൂട്ടില്‍ ചിലപ്പോള്‍ ദൈവവും 

അഹങ്കാരമായിരുനെന്ന തിരിച്ചറിവ്

സ്വയാശ്രയം നന്നല്ലെന്ന നവബോധം.

some interesting snaps

തിരിച്ചറിവ്......

      മനസ്സ് , അത് മെരുക്കാനാവാത്ത ഒരു അശ്വമാണെന്ന്   ഞാനെവിടെയോ  വായിച്ചിട്ടുണ്ട് . വാസ്തവം . നിന്നെ എനിക്ക്  ഒരിക്കല്‍ പോലും പൂര്‍ണമായി മനസ്സിലാക്കാന്‍ കഴിഞ്ഞിട്ടില്ല. ഓരോ തവണയും നീ എന്നെ  കൂടുതല്‍ കൂടുതല്‍ അത്ഭുതപ്പെടുതിക്കൊണ്ടിരിക്കുന്നു . അവസാനമായി നീ എനിക്ക് സമ്മാനിച്ചത് അത്ഭുതം മാത്രമായിരുന്നില്ല തിരിച്ചറിവിന്‍റെ   ആഘാതം കൂടി ആയിരുന്നു . ഞാന്‍ പോലും അറിയാതെ നീ എന്നെ അവനോട് അടുപ്പിച്ചു . അതൊരു അടുപ്പം മാത്രമായിരുന്നില്ലെന്ന തിരിച്ചറിവ് നീ എനിക്ക്  നല്‍കിയത് വൈകിയായിരുന്നു . ക്ഷമിക്കണം , ഞാന്‍ എന്‍റെ മനസ്സിനെ  കുറ്റപ്പെടുത്തി നിന്നെ അല്പം  മുഷിപ്പിച്ചു എന്ന് തോന്നുന്നു . വാസ്തവത്തില്‍ അതൊരു കുറ്റപ്പെടുത്തലിന്‍റെ  സംഭാഷണം അല്ല , മറിച്ച് നിനക്കു  മുന്‍പില്‍ ഞാന്‍ അനാവരണം ചെയ്ത എന്‍റെ മനസ്സാണ് . അതെ ഞാന്‍ നിന്നെ  സ്നേഹിക്കുന്നു, അഗാധമായി .  ഒരു പക്ഷെ  നിന്‍റെ ചിരിയെക്കുറിച്ച്‌  നടത്തത്തെക്കുറിച്ച് പലരും കളിയാക്കിയിരിക്കാം . പക്ഷെ ഞാനതെല്ലാം  വളരെ ഇഷ്ടപ്പെടുന്നു . നിന്നോടുള്ള  എന്‍റെ പ്രണയത്തിനു  നിന്‍റെ  പോരായ്മകള്‍   ഒരിക്കലും  ഒരു തടസമായിരുന്നില്ല , കാരണം ഒരിക്കലും  സുഖപ്പെടുത്താനാവാത്ത  വിധം  അന്ധമാണത്- എന്‍റെ പ്രണയം.  എന്‍റെ ശരീരം എരിഞ്ഞു തീരുവോളം  ആ പ്രണയം മനസ്സില്‍ ആളിക്കത്തിക്കൊണ്ടിരിക്കും,  അവസാന  നിശ്വാസത്തിലും  ആ പ്രണയാഗ്നിയുടെ  താപം  എന്നിലുണ്ടാകും . എനിക്കല്ലാതെ  മറ്റാര്‍ക്കാണ്  നിന്നെ നീയായിത്തന്നെ അറിയുന്നത് ; ദൈവത്തിനും.  എന്നെ ഞാന്‍  പ്രണയിച്ചില്ലെങ്കില്‍  എനിക്ക്  മറ്റാരെയെങ്കിലും , മറ്റാര്‍ക്കെങ്കിലും  എന്നെയും  പ്രണയിക്കാന്‍  ആവുമോ ?

ഞാന്‍ പ്രണയിക്കുന്നു എന്നെത്തന്നെ , മാറ്റമില്ലാത്ത  പ്രപഞ്ചസത്യം. മറ്റുള്ളവരെ സ്നേഹിക്കാനായി സ്നേഹിക്കപ്പെടാനായി  ഞാന്‍ എന്നെത്തന്നെ  പ്രണയിച്ചു തുടങ്ങുകയാണ് ................ .

ഉറക്കം
ഞാന്‍ ഉറങ്ങട്ടെ.........
ഉറങ്ങാന്‍ വേണ്ടിയോ?
ഉണരാന്‍ വേണ്ടിയോ?
നിരാശകള്‍ ; ഉറങ്ങണമെന്നും
പ്രതീക്ഷകള്‍  ; ഉണരണമെന്നും.
നിരാശകള്‍  വിസ്മരിക്കാനും
പ്രതീക്ഷകള്‍ക്ക് സ്വപ്നങ്ങളില്‍ ഇടം നല്‍കാനും
തിരിച്ചാവില്ലെന്ന 'അന്ധവിശ്വാസ'ത്തോടെ
ഇനി ഞാന്‍ ഉറങ്ങട്ടെ.
അല്‍പ നേരത്തേക്ക് ആണെങ്കില്‍ കൂടി
ഞാന്‍ ഉറങ്ങട്ടെ.
   

"Hen comes from egg

 And eggs come from hen  

What a conandrum" !!!!!

    മുന്‍പ് മൂന്നു തവണ parents meeting ഉണ്ടായപ്പോഴും പോകാന്‍ കഴിഞ്ഞിരുന്നില്ല. അവളുടെ പഠനചിലവ് കൂടിയതോടെ പലപ്പോഴും over time എടുക്കേണ്ടതായി വന്നിരുന്നു. Parents meetingനു വരാതിരുന്നതിനു പിണങ്ങിയപ്പോഴും ഞാന്‍ എന്‍റെ inconvenience അറിയിക്കാതിരുന്നത് മനപ്പൂര്‍വമായിരുന്നു. അവളുടെ പിണക്കത്തിനും കാര്യം ഇല്ലാതില്ല, അവളായിരുന്നു ക്ലാസ്സ്‌ ടോപ്പര്‍  അതുകൊണ്ട് തന്നെ അന്നത്തെ താരവും. തീര്‍ച്ചയായും എന്‍റെ സാന്നിധ്യം അവളാഗ്രഹിക്കും. പഠിക്കാന്‍ വളരെ മിടുക്കിയാണ് അതുകൊണ്ട് മാത്രമാണ് ഞാന്‍ അവളെ വിവാഹം കഴിച്ച ശേഷവും പഠനം തുടരാന്‍ അനുവദിച്ചത്. ഇന്ന് Head of the Department ഫോണില്‍ വിളിച്ചു, നിര്‍ബന്ധമായും വരണമെന്ന് പറഞ്ഞു. മൂന്നു സെമസ്ടര്‍ കഴിഞ്ഞിട്ടും guardianനെ കാണാത്തതിനാല്‍ ആയിരിക്കും.

                           "മേ ഐ കമിന്‍ സര്‍"

                            "യെസ് കമിന്‍ , ഇരിയ്ക്കൂ"

                            "രേഖയുടെ ഹസ്ബെന്‍റെ ആണ്"

                           "biodataല്‍ guardin ന്‍റെ  കോളത്തില്‍ നിന്നും പേരും അഡ്രസ്സും ഫോണ്‍    നമ്പറും കിട്ടി   ഭര്‍ത്താവാണ് അല്ലെ?"

                             (നീണ്ട മൌനത്തിനു ശേഷം )

                             "മൂന്നു parents meeting നും കാണാതിരുന്നത് കൊണ്ട്    

                              വിളിപ്പിച്ചതാണ്. പ്രോഗ്രസ് റിപ്പോര്‍ട്ട്‌ ഒപ്പിട്ടിട്ട് പൊയ്ക്കോളൂ"

                              "ശരി സര്‍"

******     *****    *****    *****    ****     *****     ******   *****    ******     ******    *****  

                  പത്തു ഇരുപത്തിയഞ്ച് വര്‍ഷമായി ഈ department ല്‍ ജോലി ആരംഭിച്ചിട്ട്. അഞ്ചു കൊല്ലത്തിനു മുകളിലായി headof the department ആയി പ്രവര്‍ത്തിക്കുന്നു. ഇത്രയും വര്‍ഷത്തെ സര്‍വീസിനു ഇടയ്ക്കു ഇങ്ങനെ ഒരു ധര്‍മ്മസങ്കടം ആദ്യമാണ്. കുറച്ചു മുന്‍പ് എന്‍റെ മുന്‍പിലിരുന്നു, ഭാര്യയുടെ പ്രോഗ്രസ്സ് റിപ്പോര്‍ട്ട്‌ വളരെ സന്തോഷത്തോടെയും ഉ‍ത്സാഹത്തോടെയും മറിച്ച്‌ നോക്കി, ജോലി സ്ഥലത്തേക്ക് വന്നതിലും ഊര്‍ജ്ജത്തോടെ മടങ്ങിപ്പോയ  ആ പാവം മനുഷ്യനോടു സത്യം തുറന്നു പറയാന്‍ എനിക്കെങ്ങനെ സാധിക്കും. "മനുഷ്യാ നിങ്ങളെ വിളിപ്പിച്ചത് ഭാര്യയുടെ പ്രോഗ്രസ്സ് റിപ്പോര്‍ട്ട്‌ കാണിക്കാനല്ല, കോളേജ് discipline കമ്മിറ്റി immoral traffic നു കേസ് ചാര്‍ജ് ചെയ്ത വിവരം പറയുന്നതിനാണ്" എന്ന് ഞാനെങ്ങനെ പറയും. ഒരു നിമിഷം മുന്‍പേ, അതവളുടെ ഭര്‍ത്താവാണെന്ന് അറിയുന്നതിന് മുന്‍പേ പറഞ്ഞു പോയിരുനെങ്കില്‍........     

                             
                          
                    

സ്നേഹിച്ചു കൊണ്ടിരിയ്ക്കുന്നവര്‍ക്കും സ്നേഹിക്കാന്‍ ആഗ്രഹിക്കുന്നവര്‍ക്കുമായി ഒരു പ്രേമലേഖനം 
പ്രിയതമ  എന്നോ പ്രിയയെന്നോ  അഭിസംബോധന ചെയ്തു ആരംഭിക്കുന്നതില്‍  അര്‍ത്ഥമില്ലെന്ന് ഞാന്‍ കരുതുന്നു . കാരണം അത് ഇവിടെ   എഴുതിയിട്ടില്ലെങ്കിലും എന്‍റെ ഹൃദയ ഫലകങ്ങളില്‍ മായ്ക്കാത്ത വിധം കോറിയിട്ടിരിക്കുകയാണ്. എന്‍റെ ഹൃദയത്തില്‍ പച്ചകുത്തിയ ആ വാക്കുകള്‍ കാണാനായി, ഇവിടെ ഞാനതെഴുതാതെ മനപ്പൂര്‍വം വിട്ടു കളഞ്ഞിരിക്കുന്നു. ഇന്നലെ നിന്നോട് വിട പറഞ്ഞതിന് ശേഷം എന്‍റെ മനസ്സു പ്രക്ഷുബ്ധമായിരുന്നു. നിന്നോടുള്ള എന്‍റെ ഭാവം എന്താണെന്നു വേര്‍തിരിച്ചെടുക്കാന്‍  എന്‍റെ മനസ്സ് പണിപ്പെട്ടു കൊണ്ടിരുന്നു. നിന്നോടൊപ്പം ഉണ്ടായിരുന്ന അവസരങ്ങളില്‍ ഞാന്‍   മറ്റുള്ളവരോട് ഇടപെടുനതിനെക്കാളും  മൌനിയായി മാറുന്നുണ്ടെങ്കിലും എന്‍റെ മനസ്സ് വളരെ ഏറെ വാചാലമായിരുന്നു എന്ന് നീ അറിയണം. രാത്രിയായിട്ടും എന്‍റെ ബോധമനസ്സിന് തിരിച്ചറിയാന്‍ കഴിഞ്ഞില്ല, നിന്നോടുള്ള എന്‍റെ വികാരം സൗഹൃദമോ പ്രണയമോ?  ഒരു തീരുമാനത്തിലെത്താന്‍ ഉപബോധമനസ്സിനെ ചുമതല ഏല്‍പ്പിച്ചു ഞാന്‍ കിടക്കയെ ആലിംഗനം ചെയ്തു.
............................................................."നല്ല നീലാകാശം, തെളിഞ്ഞ ആകാശത്തിലേക്ക് പെട്ടെന്ന്  മേഘങ്ങള്‍ നിരന്നു. മേഘങ്ങള്‍ പല വര്‍ണങ്ങളില്‍ ആയിരുന്നു,അവ പൊഴിച്ച മഴക്കും അവയുടെ അതേ നിറമായിരുന്നു. ഈ പല വര്‍ണ്ണ ജല കണികകള്‍ ചേര്‍ന്ന് താഴെ ഉണങ്ങിയ ഭൂമിയില്‍ നീര്‍ച്ചാലുകള്‍ കീറി. ആ ചാലുകളിലൂടെ ഒഴുകിയ ജലത്തിന് കടും ചുവപ്പ് നിറമായിരുന്നു. ആ നീര്‍ച്ചാലുകള്‍ ഒരുമിച്ചു ചേര്‍ന്ന് ചെന്നെത്തിയ സമുദ്രത്തിനു നിന്‍റെ ച്ചായയായിരുന്നു. നീലാകാശത്തിനെ സൂക്ഷിച്ചു നോക്കിയപ്പോള്‍ അതിനെന്‍റെ മുഖവും" ..................................................................................................................................................
ഉറക്കം ഉണര്‍ന്നപ്പോഴേക്കും ബോധമനസ്സിലേക്ക് ഇന്നലെ process ചെയ്യാന്‍ ഉപബോധമനസ്സിനെ ഏല്‍പ്പിച്ച data, result ആയി കിട്ടിക്കഴിഞ്ഞിരുന്നു. അതേ; ഞാന്‍ നിന്നെ പ്രണയിക്കുന്നു. മറുപടിയ്ക്കായി കാത്തുകൊണ്ട് അസ്വസ്ഥമായ ഹൃദയം അസ്വസ്ഥമായിത്തന്നെ നിര്‍ത്തട്ടെ.
                                                            എന്ന് 
                               എന്നേക്കാള്‍ നിന്നെ സ്നേഹിക്കുന്ന ഞാന്‍.

അന്തരം 
മായമില്ലാത്ത സൗഹൃദങ്ങള്‍, നിഷ്കളങ്കമായ പുഞ്ചിരികള്‍, സ്നേഹം
കലര്‍ന്ന പിണക്കങ്ങള്‍- ആര്‍ട്സ് കോളേജ് സമ്മാനിച്ച മൂന്നു വര്‍ഷങ്ങളെ വേണമെങ്കില്‍ ഈ രണ്ടു കോമകള്‍ക്കിടയിലെ മൂന്ന് വാചകങ്ങളില്‍ തിരയാം ; അത് മതിയാവില്ലെങ്കിലും. അവിടെ നിന്നു ലഭിച്ച  കുളിര്‍മയുള്ള ബന്ധങ്ങളുടെ ഓര്‍മ്മ കണ്ണുകളെ ഇപ്പോഴും തണുപ്പിക്കുന്നു. അവര്‍ എനിക്ക് ആരെല്ലാമോക്കെയോ ആയിരുന്നു- ലഭിക്കാതെ പോയ കുഞ്ഞുപെങ്ങള്‍, അനിയന്‍, ചേച്ചി.....
ആ ബലപുഷ്ടമായ മണ്ണില്‍ വേര്, തലങ്ങും വിലങ്ങും നന്നായി ഓടിയിരുന്നു. വേരോട്ടം പതിവ് പോലെ കാലം വരച്ച ഫിനിഷിംഗ് പോയന്ടിനു മുന്‍പില്‍ പിന്‍വാങ്ങി. പുതിയ മണ്ണിലേക്ക് ഒരു പറിച്ചു നടീല്‍, തികച്ചും പുതിയ മണ്ണ്. ഇവിടെ എല്ലാം പ്രൊഫഷണല്‍ ആയിരിക്കണം പോലും. ആദ്യ ദിവസം ക്ലാസ്സില്‍ എത്തിയ ആര്‍ട്സ് കോളേജ്കാരന് പുതിയ കൂട്ടുകാരുടെ മുഖം കാണാനായില്ല, അതിനു പകരം acer,DELL,TOSHIBA,VIO എന്നിങ്ങനെയുള്ള ബ്രാന്‍ഡ്‌ നെയിമുകള്‍ തിളങ്ങുന്ന സ്ക്രീനുകളുടെ പുറകുവശം മാത്രമായിരുന്നു. കാലും കൈയും ദേഹവും ഉണ്ട്, തലയുടെ സ്ഥലം ലാപ്ടോപ്  കൈവശപ്പെടുത്തിയിരിക്കുന്നു. അടുത്തിരുന്നവളെ തോണ്ടി വിളിച്ചു സ്ക്രീനില്‍ നിന്നും തല ഊരിയെടുപ്പിച്ചു. "എന്‍റെ പേര്..." മുഴുമിപ്പിക്കുന്നതിനു മുന്‍പേ "ശരി ശരി" എന്ന് പറഞ്ഞു പുറത്തു വന്ന തല വീണ്ടും സ്ക്രീനിലേക്ക്. മുന്നോടിയായി നല്‍കിയ orientation classil 'ക്യാമ്പസ്‌ ലൈഫ് ടു കോര്‍പ്പറേറ്റ് വേള്‍ഡ്' എന്ന സെക്ഷന്‍ ഉണ്ടായിരുന്നത് കൊണ്ട് വേദന തോന്നിയില്ല. ഇത്തരം പ്രതികരണം ഭൂതകാലത്താണ് സംഭവിച്ചിരുന്നതെങ്കില്‍ പ്രതികരണം ആവശ്യപ്പെട്ട ആളും പ്രതികരിച്ച ആളും കരഞ്ഞിട്ടുണ്ടാകുമായിരുന്നു. പുതിയ കൂട്ടുകാരെ ആരെയും ലഭിക്കാത്തതിനാല്‍ ലാപ്ടോപുമായി ചങ്ങാത്തം  കൂടാന്‍  നിര്‍ബന്ധിതനായി.        ഒരിയ്ക്കല്‍ wifi മോഡത്തിന്‍റെ adapter പണിമുടക്കി, കഴുത്തിന്‌ മുകളില്‍ നിന്നു സ്ക്രീനുകള്‍ മെല്ലെ അപ്രത്യക്ഷമായി യഥാര്‍ത്ഥ തലകള്‍ പ്രത്യക്ഷമായി. രണ്ടു kidneyum നഷ്ടപ്പെട്ടവരുടെ മരണവെപ്രാളം കാണാന്‍ ഗൂഗിളില്‍ സേര്‍ച്ച്‌ ചെയ്യേണ്ടതായോ നാഷണല്‍ ജിയോഗ്രാഫി കാണേണ്ടതായോ വന്നില്ല. എന്തായിരുന്നാലും അടുത്തിരുന്നവനെ പരിചയപ്പെടാന്‍ അവസരം തന്ന adapter നു നന്ദി. നാളെ മുതല്‍ suit ആണത്രേ! അന്യ വസ്തുക്കളെ ശരീരം തിരസ്കരിക്കുമെന്നു immunology ല്‍ പറഞ്ഞിട്ടുണ്ട്, adaptability യെ പറ്റി ecology ഉം evolution ഉം മത്സരിച്ചു പഠിപ്പിക്കുന്നത്‌  കൊണ്ട് കുഴപ്പം ഇല്ല.
നാടോടുമ്പോള്‍ നടുവേ.......ഓടുക തന്നെ. 

BLINഗസ്യ അഥവാ ബ്ലിംGASYA
സുവോളജി പഠിച്ചു ഒരുവിധമായെന്നായപ്പോള്‍ 
ബിസിനസ്‌ പഠിയ്ക്കാനായി 'അത്യാ'ഗ്രഹം 
തവളയുടെ പിടയലും അക്കൌണ്ട്സിന്‍റെ  കൂട്ടലും 
കിഴിക്കലും; ഒരു ചേരായ്മ
അന്തം വിട്ടിരുന്നിരുന്ന പഴയ കെമിസ്ട്രി ലാബിന്‍റെ
തനിയാവര്‍ത്തനം അഥവാ ഫോട്ടോസ്ടാറ്റ്
പോസ്റ്റ്‌ ഗ്രാജുവേഷന്‍ ഡെബിറ്റ് ചെയ്യണോ ക്രെഡിറ്റ്‌ ചെയ്യണോ?
അസെറ്റ് സൈഡില്‍ ബ്ലിംഗസ്യ 
ലയബിലിറ്റി സൈഡില്‍ എജ്യുക്കേഷന്‍-
ലോണിന്‍റെ മുതലിനോടൊപ്പം പലിശയുടെ അന്യായ കൂടിച്ചേരല്‍ 
ആലോചിക്കുമ്പോള്‍ തലയില്‍ പുകവമിക്കുന്നു
ബുക്കില്‍ പുക പടരുന്നു 
മൊത്തമൊരു 'പുഹ' കട്ടപ്പുക 
പുറം ലോകമറിയാതെ പോയ 
രക്തസാക്ഷികളോടൊപ്പം മറ്റൊരു രക്തസാക്ഷികൂടി 
അല്ല, മനസ് മരവിച്ച ജീവസാക്ഷി.   

ഇത് നിഷേധമോ? 

കറുപ്പാണ് നിറമെങ്കിലും

വെളുപ്പാണ് ഹൃദയത്തിനെങ്കിലും

കറുപ്പിന്‍റെ കട്ടിയില്‍

ഹൃദയത്തിന്‍ വെളുപ്പ്‌ മറയ്ക്കപ്പെട്ടിരിക്കുന്നു

കറുപ്പിന്‍റെ കട്ടിയെ തുളച്ചു

വെളുത്ത ഹൃദയത്തെ കാണാന്‍ കഴിഞ്ഞ

ഒരു മിഴികളും ഉണ്ടായില്ലിതുവരെ

എങ്കിലും ആ വെളുത്ത ഹൃദയം

ഇപ്പോഴും മിടിച്ചു കൊണ്ട് പറയുന്നു

എന്നെക്കാണാന്‍ കഴിയുന്ന മിഴികള്‍

തീര്‍ച്ചയായും വരും കാത്തിരിക്കുക തന്നെ

കാത്തിരിപ്പ്‌; അതസുഖകരമായൊരു സുഖമാണ്

വൈരൂപ്യത്തിനു പ്രണയം നിഷേധിച്ചതാരാണ്?

പ്രണയം, അതൊരു ഭാവമാണെങ്കില്‍,

അതൊരു സുഖമുള്ള നൊമ്പരം ആണെങ്കില്‍ ,

ഞാന്‍ ആ നൊമ്പരത്തെ പുണരാനും

ആ ഭാവത്തെ ഉള്‍ക്കൊള്ളാനും തയ്യാറാണെങ്കില്‍ ,

എനിയ്ക്കത് പാടില്ലെന്ന് പറയാന്‍ നിങ്ങള്‍ക്കെന്തു അവകാശം ?

പക്ഷെ, പയ്യെ ഞാന്‍ തിരിച്ചറിഞ്ഞു

കറുപ്പിനും വൈരൂപ്യത്തിനും എവിടെയും

"നോ എന്‍ട്രി" ബോര്‍ഡുകളും

വേദനിപ്പിക്കുന്ന പരിഹാസങ്ങളും ആണെന്ന്....

കറുപ്പ് മറച്ച വെളുപ്പിനെ കണ്ടു,

എന്‍ട്രി ബോര്‍ഡ്‌ വച്ച ആരുമുണ്ടായിരുന്നില്ല

അങ്ങനെ പ്രസംഗിക്കുന്നവര്‍ പോലും

എന്നെ കണ്ടപ്പോള്‍ അറിയാത്ത ഭാവം നടിച്ചു

ആരെങ്കിലും കാണുമായിരിക്കും...

നിങ്ങള്‍ ഒരുപക്ഷെ നിഷേധമെന്നു പറയുമായിരിക്കും

പക്ഷെ ഞാന്‍ നിഷേധിയാവുകയാണ്

കറുപ്പിനും പ്രണയിക്കാം

വൈരൂപ്യത്തിനും ആ ഭാവത്തെ ഉള്‍ക്കൊള്ളാം

തിരിച്ചു നല്‍കണമെന്ന അവകാശവാദമില്ല

പാടില്ലെന്ന നിബന്ധനയും ഇങ്ങോട്ട് വേണ്ട

എന്നെ എന്‍റെ മനോരാജ്യത്തില്‍ ,

സ്വതന്ത്രയായി വിടുക , സ്വതന്ത്രയായി .